2026年元旦球壇第1擊！澳職賽事早場有好戲上演，由榜首奧克蘭FC主場鬥紐卡素噴射機。奧克蘭FC近況大勇，聯賽3連勝後直衝榜首，士氣高昂；今場對住後防中門大開嘅紐卡素噴射機，大有機會延續勝勢，主勝值得捧場。（無綫myTV SUPER周四中午12時直播）文:工廠仔
奧克蘭FC今季表現穩定，唯一敗仗就係上年11月1比2不敵紐卡素噴射機，今場當然志切復仇。佢哋最近3場聯賽都清脆贏波，上輪對FC悉尼嘅榜首大戰，因球場問題延期，球員有更多時間休息同準備，應該可以踢出最高水平，今仗猛虎出柙當然不勝無歸。
噴射機殘陣頂唔住
紐卡素噴射機上場同FC麥克阿瑟合演瘋狂之戰，最後喺補時6分鐘失守輸4比5，除咗士氣大受打擊之外，防守上嘅漏洞亦表露無遺，今仗隨時會被奧克蘭FC針對性打爆。紐卡素噴射機目前陣容不整，中場主將麥斯貝基斯因鼠蹊傷患缺陣，後防老將蘇辛查又解約離隊，令球隊戰鬥力受到削弱，難阻強勢嘅奧克蘭FC連勝，捧主勝穩陣。
