歐聯：挑戰格流布魯日大無畏_東方日報

歐聯附加賽首回合，蘇超格拉斯哥流浪先主場出擊，迎戰比甲布魯日。「格流」雖然近況麻麻，但主場往往打高一班波，距離打入歐聯聯賽階段只差一步，今場肯定搏命；布魯日勝在歐戰經驗豐富，上季歐聯殺入16強，而且喺歐聯賽場經常開大比數，相信今場都唔例外，捧2.5球入球大。（Now643周三凌晨3時直播）文:邪神

歐戰常客唔怕鬥攻
格流近期表現一般，喺剛開鑼嘅蘇超聯賽2戰2和，仍未打開勝利之門；不過佢哋出去打歐聯就有唔同表現，歐聯第2圈外圍賽，主場首回合先贏2比0之下，兩回合合計3比1淘汰彭拿典奈高斯，上圈歐聯第3圈外圍賽對柏辛域陀尼亞，兩回合僅取得1勝1負，合計贏4比2晉級，其中首回合主場大勝對手3比0，可見佢哋主場表現較為突出。

比利時勁旅布魯日係歐洲賽常客，上季出戰改制後嘅歐聯賽事，喺聯賽階段掹車邊排24名驚險出線，最終不敵阿士東維拉16強止步，表現唔差，今場歐聯附加賽雖然要先作客，但相信仍然能夠憑較佳歐戰經驗率先搶攻，加上佢哋近7場歐聯6次開3球或以上，2.5球入球大不容錯過。