今輪巴甲壓軸戰，米拉索主場硬撼高士路。新升班球隊米拉索極為硬淨，今季聯賽8次主場出擊保持不敗，有力同爭標分子高士路抗衡。高士路防守穩健，近6場作客冇失波，總入球全部開2球或以下，中位數2.5球嘅入球細屬穩陣之選。（周二早上7時開賽）文:Mic少
米拉索可以話係巴西球壇奇葩，今季首次升上巴甲，表現一鳴驚人，5月中至8月初一度保持連續9場聯賽不敗，直至上場作客輸畀榜首法林明高先斷纜，盡顯奇兵本色，等閒之輩難以喺佢哋身上佔到甜頭。米拉索愈踢愈有信心，可憑士氣同拚勁同前列勁旅高士路抗衡。
高士路作客穩中求勝
高士路要搶分追趕榜首法林明高，但上仗主場領先下，下半場連失2球，1比2不敵山度士，難免打窒道氣。為免重蹈覆轍，今仗會踢得比較謹慎，一旦領先肯定加強防守保住勝果。睇番佢哋各項賽事近6場作客取得4勝2和，無獨有偶4場勝仗都係贏2比0，兩場和波同樣踢成0比0，入球細值得追捧。
