英超今晚上演天地對決，榜首阿仙奴迎戰包尾嘅狼隊。牌面上兩隊差天共地，不過「兵工廠」近期飽受傷患困擾，近5場聯賽3度失分，領先優勢所餘無幾，捱過「地獄賽程」後元氣大傷，今場目標只求全取3分，唔會浪費力氣去爭取大勝，博3.5球入球細更抵玩！
（Now 621及611周日凌晨4時直播）文:工廠仔
阿仙奴近1個月惡戰連場，仲出現唔少傷兵，一眾主力亦疲於奔命，今場迎戰狼隊表面「易食」，但「兵工廠」亦要爭取時間回氣，但求贏波就會收貨。阿仙奴今場或有中堅威廉沙列巴復出，防守能力有保證，不過佢哋撕破密集防線能力唔強，近4次對狼隊總入球全開3球或以下。
狼隊求守頂得兩嘴
另邊廂，排喺榜尾嘅狼隊近期場場輸波，陷入9連敗劣勢，不過佢哋作客比賽一心一意死守，表現其實唔係咁不堪一擊，近7場作客總入球全部開少過4球，當中5場開2球或以下，就算作客對住紐卡素同阿士東維拉，都只係僅輸0比1，今場面對疲兵阿仙奴，有望盡力減少失球數字，中位數3.5球入球細好路。
