今日澳職獨腳戲，阿德萊德聯主場硬撼布里斯班獅吼。「阿聯」踢法有前冇後，撞正客場後防冇咁穩陣嘅獅吼，入球騷走唔甩，2.5球大盤有計。（無綫myTV SUPER周日下午4時35分直播）文:法達斯維
「阿聯」開咧後6輪聯賽入咗11球，未計今輪，攻力僅次榜首ＦＣ悉尼，前鋒盧卡祖雲奴域近4場入3粒及2助攻，參與球隊5個士哥，腳風奇順，為博代表澳洲出戰下年世盃決賽周，必定使出渾身解數。不過「阿聯」同時失咗8球，其中5場開3球或以上，預計今場照樣有前冇後。
獅吼作客照搶
另邊廂，獅吼一洗近幾季頹風，目前位居前列，無論係老將謝爾奧沙或新星祖斯甸維迪，均有入波交到貨。不過佢哋主客表現迥異，今季主場取得3勝1和不敗之餘，仲全部保持清白身，非常硬淨，但作客2戰只得1和1負，全部都有入波同失波，明顯冇主場咁穩定。照咁推斷獅吼今仗未必死守，好大機會出現入球騷，2.5球入球大屬穩陣之選。
