戰歐霸盃嘅英超球隊諾定咸森林，今輪主場硬撼瑞典超老牌勁旅馬模。森林自戴治接手後有起色，尤其中場核心基比斯韋特連場有士哥，主場唔搶等幾時，頭4輪未「開齋」嘅馬模亦要焗攻，3.5球大盤有計。
（Now 643周五凌晨4時直播）文:法達斯維
森林開季冇耐就炒咗同老闆唔啱嘅紐奴，之後由前熱刺主帥普斯迪高路接手，點知教咗39日、合共8仗未贏過後火速落鑊，10月尾改搵前般尼教頭戴治，領軍首仗即喺歐霸盃淨勝波圖2比0。事實上戴治上任後各項賽事踢咗6場，取得3勝2和僅1敗，包括日前聯賽造訪晏菲路狂派利物浦3隻光蛋，攻力提升係關鍵，呢6仗共轟10粒，基比斯韋特更連續3仗有波入，腳風順到冇朋友。
馬模心急開齋焗攻
另邊廂，作客嘅馬模近5仗僅得1勝2和2負，仲要場場有失波，佢哋今屆4場歐霸盃，亦只得1和3負未贏過，兼失咗7粒，同樣心急「開齋」。雖然森林今屆4場歐霸盃亦只得1勝2和1負，但查實佢哋只差第8位嘅貝迪斯3分，仍有機會打入前8直接晉級16強，今輪遇弱梗係數得就數，3.5球大盤捧得過。
