周五澳職賽事，阿德萊德聯主場迎戰墨爾本城。阿聯今季因為重建，令開季成績不穩，不過呢支年輕球隊近期有愈踢愈好迹象，尤其防守方面比以前穩健唔少，今場挑戰奪標熱門墨爾本城，預計會大踢穩陣波，上半場先求不失，開半場和機會高。
（無綫myTV SUPER周五下午4時35分直播）文:工廠仔
阿德萊德聯今季提升青年軍教練安迪奧利執教，球隊走年輕化路線，雖然表現難免唔穩定，但體力充沛嘅逼搶踢法效率甚佳，上場2比0贏西悉尼流浪者就踢出代表作，西班牙中場祖安蒙尼斯首演，令中場控制力更強大。
培訓新人有一手嘅安迪奧利，喺戰術上往往先求穩陣，上半場拖慢節奏，依靠體力去逼搶阻截對手進攻；阿聯今季4場聯賽，上半場全部都同對手不分勝負。
墨城多傷兵唔敢谷
至於作客嘅墨爾本城實力強勁，不過佢哋離開主場嘅表現大打折扣，作客比賽唔敢太過進取，特別係球隊近期傷兵眾多，尼達利艾堅遜上場受傷，加入馬菲歷基、貝軒治等「十字軍」行列，上半場更加會踢得保守。墨爾本城今季5場作客比賽，亦有4次開出半場和。既然兩隊今場都有所顧慮，預計上半場會靜觀其變，博半場和好路。
