世盃外歐洲區分組賽煞科，直接出線名額將會全部誕生，其中周三凌晨C組同H組都會上演生死戰，分別係C組蘇格蘭對丹麥，以及H組奧地利對波斯尼亞。丹麥質素高於蘇格蘭，而且近4場3勝1和，作客讓平半照捧上盤；波斯尼亞為爭出線非勝不可，佢哋近6場全開3球或以上，今場作客奧地利入波唔會少，2.5球嘅入球大穩陣。（周三凌晨3時45分開賽）文:邪神
先講C組形勢，丹麥5戰3勝2和得11分排榜首，蘇格蘭3勝1和1負得10分排第2，第3同第4位嘅希臘及白俄羅斯已出局，主場出擊嘅蘇格蘭非勝不可，丹麥和波即可首名出線，形勢對丹麥相當有利。丹麥上輪對住已出局嘅白俄羅斯，竟然賽和2比2，跌到一地眼鏡碎，嚟到今場生死戰，丹麥球員自然要醒醒定定，佢哋攻力無問題，只要雙中堅維斯達加特同安達斯基斯坦臣唔犯錯，贏波冇問題。
蘇格蘭上輪關鍵戰不敵已出局嘅希臘，表現令人失望，不過幸好丹麥同樣失分，令佢哋仲有得爭，不過睇番上場對希臘表現，踢到下半場中段已經落後3球，兩位中堅格拉斯哥流浪嘅約翰修達同喜伯年格蘭漢尼唔夠班，今場仲要焗攻只會更易輸，今場丹麥讓平半，半個盤博贏晒成個盤，上盤抵玩。
波斯尼亞作客「大」起奧地利
H組方面，奧地利7戰得18分領先，波斯尼亞7戰得16分排第2，奧地利仲有主場之利，贏面高唱入雲，不過波斯尼亞殊死一博唔講得笑，加上奧地利36歲老將阿拿奧杜域，以及波斯尼亞39歲射手迪斯高上輪都入「士哥」，今場正面交鋒鬥射術，大家等睇入球騷。
