世界盃外圍賽歐洲區A組最後一輪上演生死戰，德國主場鬥斯洛伐克。兩隊現時同得12分排頭兩位，德國淨勝球多對方3球，換言之「日耳曼兵團」今仗和波都可直接出線，預料會穩陣至上。斯洛伐克守強於攻，今屆世盃外5戰總入球全開2或以下，最好揀3/3.5球入球細。（周二凌晨3時45分開賽）文:Mic少
連同合併前嘅西德，德國自1954年開始，從未缺席過世盃決賽周，今屆嚟到最後一輪外圍賽仲未確保出線資格，好大程度上因為首循環作客意外0比2不敵斯洛伐克，好彩之後踢番正常水平4戰全勝。「日耳曼兵團」吸取教訓後，今仗肯定打醒十二分精神，避免重蹈覆轍，尤其今場和波都夠出線，更加冇必要冒險搶攻。
睇番德國近兩場世盃外踢法都傾向保守，包括小勝北愛爾蘭1比0，上場對住「魚腩」盧森堡都只係贏2比0，3個入波都來自前鋒禾達美迪，進攻招數略嫌單調。加上兩位射手夏維斯及穆斯亞拿養傷冇入選，中前場人腳選擇有限，一旦禾達美迪被嘜死，攻力勢必大受影響。
斯洛伐克攻力弱雞
斯洛伐克屬典型守強攻弱球隊，5場世盃外入6球同時失2球，上輪主場對北愛爾蘭，要踢到補時先至入波打破悶局，險勝1比0。今晚造訪德國，入波機會更加低。事實上佢哋亦要提防主隊，未必會勉強壓前搶攻，否則一旦先落後，就更加難收復失地，估計同樣穩陣行先，睇下搵唔搵到機會「偷雞」，今場入波唔會多。
