今晚世盃外亞洲區第5圈首回合，阿聯酋主場擺擂台迎戰伊拉克。兩軍近況同樣麻麻，加上屬首回合，預料未摸清對方底細都唔敢亂嚟，加上伊拉克習慣初段先求唔輸，半場和可以再追。（港台電視32周五凌晨零時直播）文:路西法
伊拉克踢法極謹慎
先講講賽制，第5圈係打兩回合，勝方將晉級洲際附加賽，向決賽周之路進發，負方則4年後再見。阿聯酋狀態一般，雖然前鋒卡奧盧卡斯上圈有士哥，但整體攻力不濟，近4場世盃外只得1勝2和1負僅入4粒，唯一勝仗係擊敗實力較弱嘅阿曼，面對吉爾吉斯同烏茲別克都只能打和，就算有地利亦不宜高估。
伊拉克近況亦唔好得幾多，佢哋近4仗世盃外僅獲2勝1和1負，入得2球仲少過阿聯酋，同時亦只失2粒，防守叫做穩健。睇番佢哋呢4場波，全部上半場都係開0比0，可見伊拉克初段相當小心，避免太早失波而陷入困局，仲可以藉住上半場嘗試摸清對方虛實，易邊後睇準機會先嚟料，嚟到第5圈隨時踢得更保守，再開半場和唔奇。
