世盃外歐洲區D組關鍵戰，上屆亞軍法國主場硬撼烏克蘭。「高盧雞」只要今仗贏波即出線，但飽受傷兵困擾下，主帥迪甘斯會延續保守作風，但求悶悶地贏；烏克蘭作客唔敢冒進，一於要3.5球細盤。（周五凌晨3時45分開賽）文:法達斯維
法國上輪喺傷兵滿營兼大意情況下，被冰島逼和2比2，目前仍以10分排緊D組榜首，若果今場贏波，就會甩開次席烏克蘭6分，提早1輪直接出線，就算和波維持3分差距，由於法國得失球充滿優勢，尾輪只係對弱旅阿塞拜疆，出線機會仍然極高。估計法國今場策略穩中求勝，贏唔到都唔可以輸，一來迪甘斯不嬲保守到暈，二來今期同樣遇上傷兵潮，杜林兄弟、奧士文尼迪比利、迪斯亞杜伊及曹亞文尼等因傷落選，就算隊長基利安麥巴比趕及復出，但整體攻力明顯受削，迪甘斯教埋下年就約滿走人，入唔到世盃決賽周就英名盡喪，點都穩陣行先。
烏克蘭唔敢輕舉妄動
作客嘅烏克蘭當然想擊敗法國追至同分，主帥列布夫亦崇尚進攻，奈何佢哋三線有多名球員臨時因傷退隊，包括多夫碧、巴拉沙高及巴達豪夫等，對攻守影響甚大，造訪法國唔會輕舉妄動，加上雙方近3次碰頭，都係1球起、2球止，包括9月首循環交手法國輕取2比0，寧捧入球細。
