歐聯強弱懸殊之戰，布魯日主場對巴塞隆拿，論整體實力，西甲豪門巴塞一定佔上風，尤其是射手羅拔利雲度夫斯基已傷愈復出，令鋒線如虎添翼，有力迅速入波領先，但後防並唔穩陣，失波機會亦相當高。考慮到巴塞跨屆近5場歐聯有4次上半場總入球開2球或以上，首選中位數1.5球嘅半場大。（Now 643周四凌晨4時直播）文:Mic少
巴塞隆拿今屆歐聯3戰2勝1負，急需要搶分奪取前8位直接出線16強資格，今仗造訪比利時，應會加強火力進攻。事實上，巴塞狀態勇猛，近4仗除咗西甲不敵皇家馬德里之外，另外3場都贏波，包括歐聯大勝奧林比亞高斯6比1，該仗拉舒福特梅開二度，呢位英格蘭前鋒腳風非常順，為巴塞上陣14場入6球及7次助攻。加上費倫托利斯、拉明耶馬、費明盧比斯等中前場球員輪流發威入波，進攻多元化，令對手防不勝防。
布魯日靠反擊偷雞
此外，羅拔利雲度夫斯基上場西甲後備上陣復出，鋒線人腳更齊整，意味正選位置競爭愈來愈激烈，各人肯定更落力爭取入波，展現身價。不過，巴塞防線欠穩，近8場有7場上半場有失波，布魯日有機會偷雞入波。
比甲球隊布魯日今屆歐聯3戰僅獲1勝2負，為保持出線希望，只能豁出去一搏，佢哋近6場比賽贏5場，具備不俗反擊力，隨時上半場就同巴塞隆拿駁火。
