英聯盃第4圈仲有聯賽1哥阿仙奴喺主場迎戰白禮頓，「兵工廠」近期一口氣連贏7場，包括上圈英聯盃收起主力都輕鬆贏波；白禮頓上場聯賽畀曼聯打爆仲未回氣，作客酋長球場更難打，考慮到雙方3次碰頭，阿仙奴都喺上半場領先，預計今場會藉地利先發制人，吼半場主勝。（無綫myTV SUPER周四凌晨3時45分直播）
經過近年探索，阿仙奴終於搵到贏波模式，進攻減少華麗偏向實用，死球進攻極高效率，經常早段開紀錄，失球數字亦甚低，真正做到「悶悶地贏」；球隊喺聯賽同歐聯向前推進，英聯盃雖然會收起主力，但贏波機會仍然甚高。
小將搏命力爭上位
阿仙奴板櫈深度非常充足，麥斯杜文等自家青訓球員冒起，英聯盃正正係呢班小將們爭取表現嘅舞台，為博取主帥阿迪達歡心，今仗一定搶韁。
「海鷗」白禮頓踢法偏重進攻，上兩圈英聯盃都贏低組別球隊6比0，對方空群而出反而給予阿仙奴更多反擊機會，只要早段入到波，阿仙奴半場主勝就可袋袋平安。
