上周英超雙紅會，當曼聯公布正選陣容後，不少球迷、網民，甚至乎足球評述員都批評魯賓艾摩廉的排陣，用卡斯米路拍般奴費南迪斯踢雙中場，馬菲奧斯根夏踢最前，肯定會被利物浦大炒。
結果當然係一地眼鏡碎，大家都排隊道歉。艾摩廉的戰術部署，有值得細味的地方，前仗贏新特蘭，門將辛尼拉文斯大腳向前，些斯高爭頂有優勢，取得不少甜頭，雙紅會換來不擅頂的根夏，球迷擔心理所當然。然而艾帥暗度陳倉，他知道根夏做最前點唔會爭頂成功，所以在多次長傳部署上，安排於爭頂點附近狹小範圍內部署多3、4位球員，最前面爭頂只是虛擊，目標是搶之後的第二點，幾次都成功搶到，先開紀錄的入球就係般奴費南迪斯企正第二點，再策動快速進攻。
只係做到一個戰術、贏到一場波，唔代表艾摩廉會在紅魔取得成功，但近期見到他真正理解到英超的殘酷，在踢法上放棄一些堅持，就球員的特點去作出改變。近2場減少組織，直接由後者大腳上前，靠鋒將能力創造機會，避開中場的缺點，艾摩廉做到揚長避短，不過本輪對白禮頓是另一考驗，皆因他們近7次英超對後者只得1勝6負。
如果再過一關，取得3連勝，艾摩廉和曼聯才真正走上正軌。蘇偉業