德甲上演「國家打吡」，拜仁慕尼黑主場迎戰多蒙特，榜首拜仁今季聯賽6戰全勝弗到爆，至於第2位嘅多蒙特亦表現進取，前鋒古拉斯踢法充滿侵略性。翻查兩隊近12次交鋒有10次總入球開4球或以上，首選中位數3.5球嘅入球大。
（Now 639周日凌晨零時30分直播）文:Mic少
衞冕嘅拜仁今季各項賽事連贏10場，並且往往大勝對手，包括大炒現時排第3位嘅RB萊比錫6蛋，鋒線無堅不摧。射手哈利卡尼狀態弗爆，球隊6輪聯賽攻入25球當中，呢位英格蘭球星包辦當中11球，佢亦喺日前世盃外圍賽為英格蘭上陣對拉脫維拉梅開二度，腳風極順。此外，兩位翼鋒路易斯迪亞斯、米高奧利斯傳射能力俱佳，拜仁靠呢個進攻「三叉戟」足以撕破多蒙特防線。
多蒙特豁出去駁火
至於多蒙特聯賽6輪獲4勝2和，暫時落後拜仁慕尼黑4分，今仗勢必把握機會擊敗對方，務求拉近彼此積分距離，相信「蜜蜂兵團」為3分會豁出去一搏，實行同拜仁鬥攻。事實上，多蒙特攻力不俗，前鋒古拉斯今季聯賽上陣5場入4球，效率甚高，有力射破對手大門，預料兩隊好大機會合演入球騷。
