女子歐聯第2輪重頭戲，馬德里體育會女足主場迎戰曼聯女足，雙方首輪都旗開得勝，但論近況「女紅魔」更勝一籌，各項賽事近4場錄得3勝1和。反觀馬體會女足剛於上場聯賽慘敗0比6，士氣肯定大受打擊，曼聯女足正好乘虛而入，作客亦有力全取3分。
（周五凌晨零時45分開賽）文:Mic少
馬體會女足上輪歐聯係威係勢，大勝奧地利球隊聖普爾頓女足6比0，但只因對手實力太弱。馬體會女足上場聯賽主場對傳統勁旅巴塞隆拿女足，立即打回原形，慘吞6蛋，名副其實遇強即屈。加上球員剛經歷大敗，難免影響信心，匆匆再踢歐聯大戰，隨時又會犯錯。
至於曼聯女足上輪歐聯以1比0小勝華拉倫加女足，上場女子英超對愛華頓女足，即使半場落後，但換邊後連入4球，反勝4比1，難怪被指比曼聯男子隊更有「魔性」。
馬體會遇強即屈
事實上，「女紅魔」擁有唔少著名球星，尤其係英格蘭中場艾娜東妮狀態大勇，上月底女子英超「雙紅會」射入宿敵利物浦女足大門，上仗則貢獻兩次助攻，有佢組織攻勢，曼聯女足今場入波機會甚高。包括外圍賽在內，曼聯女足近5場女子歐聯取得4勝，水準靠得住，可望全取3分而回。
