聽朝上演多場巴甲聯賽，包括「雙高之戰」保地花高主場火併法林明高，排第2位嘅法林明高落後榜首彭美拉斯3分，為搶奪一哥位置，必定搏到盡。反觀保地花高頻頻失分之後，爭標機會相當渺茫，戰意唔及對手。以法林明高近4場聯賽作客3勝1負走勢，客勝值博。（周四早上6時30分開賽）文:Mic少
法林明高上場0比1不敵巴希亞，主因係後衞丹尼路雷斯開賽13分鐘食紅牌被逐，加上前鋒華萊士恩後備上陣冇耐亦被趕出場，踢少兩人之下輸波，並唔可以作準，相信球隊吸取教訓後，今仗會打醒十二分精神。事實上，法林明高猛將如雲，擁有前阿仙奴中場佐真奴費路，前馬體會翼鋒森美爾連奴等多位去過歐洲搵食嘅球員助陣，以佢哋嘅級數，應該可以協助球隊迅速重回正軌。
保地花高鋒線啞火
第5位嘅保地花高狀態持續低迷，上場對聯賽榜下游球隊國際體育會，都淨吞兩蛋而回，近4場聯賽只有1勝1和2負，已被榜首彭美拉斯拋離15分，兼踢多1場，爭標機會名存實亡，現時惟有寄望打入前4位，奪取下屆自由盃席位。問題係保地花高鋒線啞火，近3場入得2球，想搶分亦有心無力。加上防線不穩，上月主場對米拉索，上半場領先3球都被對手逼和，今仗遇上實力更強大嘅法林明高，輸埋唔奇。
