世盃歐洲區外圍賽F組重頭戰，葡萄牙主場火併匈牙利。葡萄牙今仗贏波，就好大機會進身決賽周，C朗為個人第6度出戰世盃必搏，不過匈牙利絕非善類，今仗一定小心為上，加上近年碰頭旺半和，不妨再追。（周三凌晨2時45分開賽）文:法達斯維
葡萄牙喺F組頭3輪贏晒，依家領先匈牙利5分及阿美尼亞6分，若果今仗順利擸晒3分，而阿美尼亞又贏唔到愛爾蘭，葡軍就可以提前兩輪出線，亦令C朗自2006年起，連續6屆參加世盃決賽周。不過呢位隊長上仗操刀12碼宴客，幾乎做咗失分罪人，好彩有魯賓尼維斯補時入波，先至險勝愛爾蘭1比0，亦反映出葡軍整體狀態一般。
匈牙利名將壓陣咪睇少
另邊廂，匈牙利上仗輕取阿美尼亞兩粒，打開今屆世盃外勝利之門，講到爭首名直接出線資格，雖然機會麻麻，但預計佢哋今仗會同葡萄牙死過，畢竟中場蘇保斯拉爾等都有一定實力，唔會畀葡軍咁易得逞，上月主場交手力戰下僅輸2比3，有辦你睇。翻查紀錄，兩軍之前5次碰頭，葡萄牙取得4勝1和，不過只有兩次大炒，另外兩次都係險勝1粒，而呢5仗中有4次開半場和，可見葡萄牙踢得相當謹慎，半場和有計。
