意甲焦點大戰，祖雲達斯主場對AC米蘭，雙方走勢南轅北轍，「祖記」開季3連勝後，表現無以為繼，各項賽事近4場全部打和。反觀，AC米蘭愈戰愈勇，取得聯賽4連勝，包括擊敗上季冠軍拿玻里，教練阿里基今仗倒戈復仇，更加要做齣好戲，力爭贏波而回，今場開平手盤，AC米蘭比較值博。（Now 638周一凌晨2時45分直播）文:Mic少
祖記體力輸蝕士氣差
祖雲達斯上季由莫達執教，經常和波失分，捱唔完一季就被炒，請來名宿杜陀領軍，雖然踢法比以往悅目，但成績並冇大改善，尤其是近期再度陷入「和波魔咒」，甚至對弱隊維羅納，亦只能踢成1比1。「祖記」上周中歐聯作客西甲球隊維拉利爾，踢到臨完場前被對手逼和2比2，進一步打擊士氣，匆匆再踢意甲硬仗，球員體力難免比較輸蝕。
至於AC米蘭今季冇份參加歐洲賽，可以專注聯賽爭標，成績有明顯提升，除咗首輪聯賽意外不敵克雷莫納之外，其後4場全勝。主帥阿里基喺2023/24年球季協助「祖記」捧意大利盃冠軍及意甲季軍，但仍然被解僱，今季執教A米，正好把握機會報仇。事實上，阿里基曾兩度執教「祖記」合共8年，相信早就諗定破敵良策。
