今晚日職下游對決，湘南比馬主場火併東京綠茵。湘南比馬護級形勢危殆，雖然連場落敗，但為搶分冇得諗要主動搶攻，遇上客場奇差嘅東京綠茵，捧2.5球大盤最划算。
（周五晚6時開賽）文:法達斯維
湘南比馬狀態差到冇朋友，各項賽事近8仗輸咗7場，包括聯賽6連敗，上次聯賽贏波已經係5月中嘅事，難怪依家淪為尾2，仲要與「安全線」第17位橫濱水手有6分嘅距離，聯賽剩番6輪，時間無多場場都要搏，唔係就下季日乙見。湘南比馬近期主場例搶攻，近5場主場全開3球或以上，包括激戰大阪飛腳惜敗4比5，明顯豁咗出去，實行有前冇後、打死罷就。
東京綠茵唔可以再Hea
另邊廂，東京綠茵本身護級壓力唔算大，近期表現明顯走樣，之前7場聯賽僅得1勝2和4負，搞到現時只排第16位，雖然仍領先尾3嘅FC橫濱5分，但都唔可以再hea落去。不過佢哋客場戰績不濟，單計近6場聯賽作客，只獲2和4負，而且近3次對住湘南比馬輸晒，未必頂得住「剋星」。當然，以湘南比馬聯賽6連敗嘅狀態，捧主勝亦唔夠信心，既然佢哋主場入得又失得，寧捧入球大。
