亞冠精英盃第一圈外圍賽，成都蓉城對曼谷聯。中超球隊成都蓉城近況出色，近5戰全勝，出戰亞冠精英盃絕非陪跑，至於曼谷聯上季角逐亞冠盃2，今季升格踢亞冠精英盃，亦希望可以行得更遠，今場兩雄相遇，入球唔會少，成都蓉城近10場8次開3球或以上，2.5球入球大屬信心之選。（周二晚7時35分開賽）文:邪神
韋世豪停賽火力依然
成都蓉城係亞洲賽初哥，今場優勢在於有主場之利，不過國腳韋世豪要停賽，原因係韋世豪喺2023至24球季亞冠盃為武漢三鎮披甲時被罰停賽3場，餘下1場未執行留到依家，要等成都蓉城晉級正賽，韋世豪先可復出，至於韋世豪今場空缺由德爾加多填補，前鋒費利佩近2場入3球，腳風正順，今場有望繼續有「士哥」。
反觀曼谷聯係亞洲賽常客，前季亞冠盃小組首名出線，戰至16強止步，去年亞冠精英盃外圍賽不敵ＦＣ山東，降格踢亞冠盃2，於小組首名出線後，同樣喺16強出局，賽前預計其實際戰力強於成都蓉城。不過該隊由今年4月初至今未踢過正式比賽，球員狀態肯定唔及正值季中嘅成都蓉城，雙方差距收窄，加上成都蓉城經常開大特性，入球大可輕鬆達標。
