今晚英超壓軸尾場上演重量級對決，由阿仙奴主場硬撼曼城。阿仙奴近年鬥強隊表現零舍突出，其中主場對親曼城，例搶韁經常先入波，加上「藍月亮」主帥哥迪奧拿賽前寸徒弟、阿仙奴領隊阿迪達靠使錢先至成功，勢必激起「兵工廠」眾將鬥心，一於捧阿仙奴「第一隊入球」。（Now 621及611周日晚11時30分直播）文:法達斯維
阿仙奴近年遇強甚少輸波，之前23次喺英超對傳統Big 6球隊只曾1敗。雖然布卡約沙卡、馬田奧迪加特、夏維斯等主力仍要養傷，好彩約基利斯、馬度基、伊比爾治伊斯等新兵極速融入，3人已交出入波或助攻，踢法更加直接，連已被貶為後備嘅加比爾馬天尼利同李安度杜沙特，喺上周中歐聯作客贏畢爾包2比0之役，下半場入替各入1粒兼助攻，大打爭氣波，亦反映出佢哋板櫈深度夠充足，挾各項賽事近5仗贏4場之勢，必想乘勝追擊。
寸阿迪達用錢換成功
另邊廂，曼城雖然上輪聯賽大勝曼聯3比0，但頭4輪聯賽只獲2勝2負，仍處於重建階段，而且佢哋喺上周五凌晨歐聯先對完拿玻里，比上周三凌晨已戰罷歐聯嘅阿仙奴，足足少兩日時間休息，體力點都輸蝕，亦令主帥哥迪奧拿大呼不公。
除此之外，哥帥又「明讚實彈」，話徒弟阿迪達透過幾個轉會窗不斷強化阿仙奴陣容，持續進步，但又稱假如「達Sir」最終帶隊贏到英超冠軍，都係全靠佢有咁多錢買人而已，呢番言論隨時刺激起「兵工廠」眾將爭勝決心。睇番阿仙奴近4次主場對曼城，有3次先開紀錄，明顯「達Sir」於主場係採取先發制人策略，不妨再博「兵工廠」先入波。
