早場「默西賽德郡打吡」，利物浦喺晏菲路主場鬥愛華頓。「紅軍」雖然5連勝，但全部都陷於苦戰，而且以往鬥「拖肥糖」都甚少大手交易，近7次交手6次開2球或以下，今場不妨向中位數2.5球入球細埋手。
（Now 621及611周六晚7時30分直播）文:渡邊年
利物浦嘅5連勝說明咩叫做「好波不如好運」，5場都係80分鐘後入波奠勝，即使上場聯賽鬥般尼多踢1人，仍然要靠12碼先至喺補時階段險勝1比0。周中歐聯「紅軍」有阿歷山大伊沙克正選上陣，睇得出佢係有質素同啱利物浦用，但估計仍然需要啲時間同隊友夾，利物浦之前幾場啲老鼠拉龜場面，有機會喺今場打吡再度出現。
嚴防基亞利殊竄擾
愛華頓上季中由莫耶斯重新執教後，成績保持平穩，今季有基亞利殊從曼城加盟，整體演出更加進步，有佢喺前場做竄擾，利物浦後防亦唔敢壓得太前，「拖肥糖」今場絕對有力同「紅軍」打成均勢，事實上，兩軍交戰以往都例少交收，2.5球入球細玩得過。
